Bothe of gold & of goodes, er þei go wille,
ffor the losse & the lure of hor lef pepull;
And Amphimakus, the fre sun of the fyn kyng,
To be exiled for euermore, as Enmy of toune,
Line 11600
Neuer in plit to Repaire to his pure fryndis,
Ne the Cité to se, while hym-selfe lyues."
This prokert full prestly with prayer before,
The traytor Antenor to the tru kynges;
Line 11604
ffor þat noble hym denyet naitly or þan,
When he proffert to priam pes for to make.
Lo! how fortheris a freike with a fyne wit,
ffor to kepe hit in close, & carp hit no fer;
Line 11608
To speike in despite & Spedis no more,
But hyndres full heghly & harmys hym-seluyn.
Lo! Amphimac the fre, for his fell wordes,
Was dampnet in-dede, þof þai du were;
Line 11612
Ellis the traytor Antenor hade truly no cause
ffor to procur his payne, and his pale harme.
But god, þat all giltis godely beholdis,
And wrangis in his wrathe writhis to ground, [folio 177a]
Line 11616
Oft-sithes in the same settis to fall
A man with þat mesure he metis till another!
To Antenor hit tide, tellis the story,
An exile for euermore efter a while,
Line 11620
Thurgh Eneas, þat egurly exit þerto,
As I shall tell full tite, when the tyme askes.
While thies kynges were in councell, þat comyn fro þe grekes,
Within the palis of prise, as the prose tellus,
Line 11624
There was an orible noise, þat noyet hom full sore,
As a clamour or a crye of a cant pepull,
As þai satyn all somyn sodainly come,
Vne playne in the place þere þe prise met.
Line 11628
ffor doute of hor dethes, tho doghty men bothe
Were a-ferd of the fare and the fell noise,
