With weping & waile, wo to be hold,
And myche sykyng & sorow on our sad knightes.
Line 11500
"To abstene of þis stoure & our stithe harmes,
Soche langour to let, & lotis vnfaire,
Hit is wit, as I wene, wayes to seche,
Soche dole & deire to dryue to an end."
Line 11504
Þan he said in his saw, þat sothely the grekes
Wold not agre to þat graunt, but for a gretesowme
Of gold, & of godis, & of gay Iuellis,
With stuff to restore for hor stith harmys. [folio 175b]
Line 11508
Wherfore, to qwheme & to white vs of skaithe,
Euery buerne in þis burgh, þat is best storit
Of meblys, & money, & of main syluer,
Helpis now hertely þis harme to redresse:
Line 11512
ffor bettur is a buerne by hym sum pes,
Þan in wandreth & woo to wepe all his lyue.
And for he kowth not by course come to an end,
All þere wille for to wete at þe wale tyme,
Line 11516
He couet at the kyng, & all the kyd pepull,
Eneas eftsones þat erend for to wend
With hym-seluyn, for-sothe, on þe same nedis,
All þere wille for to wete & wayne at þe last,
Line 11520
And for þe grete of þo grekes shuld no gawde wene,
But leue hit more lelly & listyn the bettur.
All the pepull in þat presse, þat the prose herd,
Afermyt hit as fyn þat þe freike said.
Line 11524
Eneas after this, euyn with þat other,
And Taltilus, tombly to þe tenttes yode.
All the councell fro kourtt was clenely depertid.
Priam with pite þan past to his halle,
Line 11528
Myche water he weppit wringyng his handes.
Hit was dole to the dethe þe Duke to behold,
Euer hedyng in hert of the hegh treason,
Þat was cast for þe kyng, of his kyde fryndes;
Line 11532
