If þai hade wille to þe werke, wete hom to say,
With-outyn gawdyn or gyle, glose hit not lengur,
Line 11468
And what godes þai wold gyffe to the gret harmes,
To affirme hit as fast, fynally for euer.
Antenor also angardly desyret
The body of the bold qwene, þat in the burne lay, [folio 175a]
Line 11472
Pantasilia, with pyne to put into graue:
With myche labur, at the last, þo lordes hit grauntid.
Þan the traytor vntrew, trust me for sothe,
Toke leue at the lordes, & lowted hom all,
Line 11476
With Taltillus, þat other þat I told first,
And soghtyn to þe Cité somyn belyue,
Past vnto Priam, present hor wille,
All the case of hor come, cantly with mowthe.
Line 11480
The secund day suyng, sayes me the lettur,
Priam, the prise kyng, prestly comaundit
All the buernes of the burghe, bacheler & other,
To appere in his presens the profer to make,
Line 11484
And the tale of Antenor vntristy to here,
Of his message by mouthe, what he mene wold.
When þai comyn were to court, comyns & other,
Antenor his tale tombly began.
Line 11488
He thoght his falshed to feyne, vndur faire wordes,
And his cautels to colour vnder coynt speche.
He said in his sermond, þat sothely the grekes
Were of pepull & pouer plaintius mony;
Line 11492
And how þai depely desyret with a due hert,
To haue suertie full sad of a syker pes.
Thus sotelly with sothyn he set hom a cas,
What fortune might falle vndur fals colour.
Line 11496
Þan nemmyt he what noy, the noble men of troy
Enduret on dayes, dole for to se:
