I will þou be wise, & wirke as I bid:
Kepe ye in couert with knightes a few, [folio 173b]
Line 11368
Of ledis, þat vs loues, of lewté to forther;
Kacche hom þan kenly, & bryng hom to ground."
He assentid full sone the sagh to perfourme,
And to kepe hit as in councell kenely assurit.
Line 11372
But oftsythes hit is sene, & sum men hath feld,
Þat spokyn is in speciall, spredes o fer.
In yche company is comynly a claterer of mowthe,
Þat no councell can kepe, ne no close talis.
Line 11376
To þes traytours was told the entent of þe kyng,
On what wise in this world, no writ me declaris.
Þai assemblit full sone of assent other,
Þat knew of hor cast, & comynt to-gedur.
Line 11380
All sweire þai, full swiftly, vpon swete haloues,
Neuer to councell to come, but in cleane armes,
With a pouer of pepull purpos þerfore,
If euer the souerain hym-self sent for hom efte.
Line 11384
This Eneas, of abell men was angardly grete,
Of kyn and of cosyns, & kydmen of strenght:
He hade fryndes full fele, fild of all goodis,
And as plentuus of pepull as Priam hym-seluyn.
Line 11388
Antenor also was abill of fryndes,
Large of aliaunce, louet within:
A Riche mon of Renttes, Relikes ynow,
And fele of affynité, þat folowet hym after.
Line 11392
Thies curset of þe case hade comynt with the grekes,
Hom-seluyn to saue & hor sad fryndes,
Hor renttes, hor Riches, hor relikes also,
ffor daunger, or deire, depely assurit.
Line 11396
Þan the kyng vnto councell comaund hom bothe,
To appere in his presens þat purpos to end,
ffor to trete of a trew qwill the tyme hade,
