The xxviij Boke: of the Counsell of Eneas and Antenor. Of the treason of the Cite.
Now þe troyens, with tene, all þe toun ȝatys
Keppit full cloyse, with care at hor hertes;
Line 11152
Withouten hope of any helpe holdyn hom with-in,
Or any socour to be send out of sere londys.
All the burgh is full bigge, ouer the brode wallis, [folio 170b]
Wacchemen for to wale, wacches to kepe,
Line 11156
Of trewmen in towres, for treason of other,
The Cité to saue fro saute of hor fos.
ffor the heght is so hoge of the hegh touris,
With dykes so depe drâghen a-boute,
Line 11160
Þat no werriour hit wyn may to þe worldes end,
But þurgh failyng of fode, þat fainttes þe pepull.
ffor Pantasilia the pert pytie was made,
Þat offendit þere fos with hir fyne strenght.
Line 11164
Mony doghty þat derfe vnto dethe broght,
And britnet on the bent with hir bale maidnes.
Myche tene hade the troiens for þe tryet lady,
ffor þai the corse might not cacche, as þe kynd wold,
Line 11168
ffor to bery in the burgh, hor bale was the more,
Ne to forther þat fre with fynerall seruys.
The grekes gedrit full grymly to þe gret yates,
