Gird hym full graidly with a gay sworde,
Bad hym nait hit nemly, and noy of his fos,
Line 10940
And dere for the dethe of his dere fader.
Two spurres full spedely spent on his helis,
Þat were gaily ouer-gilt, þo grete with hor hondes;
Þai betoke hym the tent of his tried fader,
Line 10944
And all the harneis hoole of þat hed kyng.
There þai fourmyt a fest with a fyne wille, [folio 167b]
Serten dayes by-dene, duly to hold;
With Sacrifice solemne soghten þere halowes,
Line 10948
And all glad were þo grete of þe gome þan.
THE XXII & XXIII BATELL OF THE CITE.
When hit drogh to þe day, the Dukes with-oute
Busket vnto batell, and the burgh alse.
Tho mighty with mayn metton in the ffeld,
Line 10952
And girdon to-gedur on a grym wise.
Pirrus vnto prese put hym anon,
In the honerable armys of his avne fader.
Polidamas he preset with a prise swerd,
Line 10956
With sleght for to sle, & slyng vnto ground;
But hit passit his pouer, for his pure helpe
Of Phylmen, the fuerse kyng, fendit hym wele.
Pirrus, that proud kyng, presit so fast,
Line 10960
Þat he gird hym to ground of his gret horse.
He macchit hym with might þe mon for to take,
As by witnes in wer, & away lede:
But the Pafigons prudly put hym agayn,
Line 10964
Thaire lord to deliuer with his lyf hoole.
The Mirmydons mightely mellit hom with,
Þat þai caght not the kyng, þof þai care þolit.
Pantasilia come pertly with hir pure maidnes,
Line 10968
Brusshet into batell with a breme fare.
(All þaire colouris by corse were of cleane white,
