At the dethe of the derfe prince, soche a dynt hade,
Line 9340
I wend neuer, witturly, walked on fote.
Hit greuys me full gretly, & to ground brynges,
Whethur Elan be so honerable, or of so hegh prise,
ffor hir, oure Dukes to dethe, & oure derfe kynges.
Line 9344
In yche lond, lelly, þat lithe vnder heuen,
Are wemen to wale, of worship full mony,
Þat Menelay may mightily mell hym to haue,
And chose hym a choise, withouten charge heuy;
Line 9348
And not so mony be mard, ne on mold ded,
Ne all grece for to greve, with no ground harme.
Hit is not light for vs lite, þis lond to dystroy,
Þat haue a Cité full sure, & Surffetus mony,
Line 9352
Bothe of kynges, & knightes, & kid men of armes:
And we, the worthiest in wer, haue wastid in dethe,
Kyld of oure kynges, and other kyd Dukes.
This suffises, me semys, to ses with oure worship;
Line 9356
Kayre to oure cuntre, & couet no more!
Þof Elan leue in þis lond, & not laght worthe,
Hit greues not full gretly, ne no ground harme,
Syn we Exiona, the suster of the sure kynges,
Line 9360
At hom holdyn for hir, þat is a hede lady,
And more honerable þan Elan, of auncetre grete."
When the wegh hade thies wordis warpit to end,
Here he seset full sone, said he no more.
Line 9364
Þan Toax, the tore kyng, talkys agayne,
With Menelay & mo, mighty of astate,
Gright with the gret & agayne stode:
