And wreke þe on weghis þat þe wrathed hase.
Line 3616
Yow know þat our kyngdomes are of clene strenght,
And we haue felowes full fele þat vs faith owe,
To wreike vs of wrathe & our wronge ricche.
All Grece, for þis grefe, with þere grete ostis,
Line 3620
Wilbe redy to ryse with a ranke pepull;—
Euery kyng for to cum with knightes enarmyt,
ffull stoutly with strenght to stir on our fos. [folio 57a]
With a nauy full nobill, naite for þe werre,
Line 3624
We shall tyre vs to Troy tomly to gedur;
And if hit tyde vs our tentis tild on þere londe,
Hit shalbe hevi & harde, & happi vnlike,
Þat any frigies vs fere, or to flete dryue;
Line 3628
But it happon hom harder in a hond while,
And the dernyst be dede with dynte of our hondes.
Þaire pepull & hor power to pyne as vs liste,
Troy and þe tresoure take at our wille,
Line 3632
Bete downe the bildynges to þe bare erthe.
And paris, þat is prinsipall of our pure hate,
Iff hit happe vs to hent, hongit shalbe
As a felon falsest foundyn with thefte.
Line 3636
Hit is sothely to sese of sorow in mynde,
And to all the kynges by course, þat knowen are in Grece,
Dukes by dene, & other derfe Erles,
Let vs send to hom salus solemli by letre,
Line 3640
Praiand hom prestly with all our pure hertis,
To helpe vs in hast our harmys to venge,
And dyshonour and daunger done to our rewmes."
When Agamynon the graithe hade geuen þus to red,
Line 3644
Menela mightily made for to write
