His Cite and his Syb men to sorow for eld;
His londes, his legemen, out of lyue broght; [folio 30b]
His suster into seruage & to syn put;
Line 1804
And oþer Redurs full ryfe in his Rewme dyd.
His golde and his goodis grippit also;
Pikked all his prouynce & full pore leuyt,
Withouten cause but of couetous, þat come of your seluyn.
Line 1808
Qwherfore, to qweme qwyt of all other,
To skape out of skathe and sklaunder to falle,
In obregyng of batell & buernes to saue,
As ye ben wegh full of wit & for wise holdyn,—
Line 1812
To send hym syster vne in sounde home,
And all giltis for gyffen & greuanse for Ay."
When Pelleus persayuit þis in a proude yre,
Sodenly he sourdit into soure greme,
Line 1816
And Priam reprouyt as a pure fole,
With hethyng and hate as hys hegh wordes.
Antenor full tyte to trusse he comaundes,
At the most in a moment of his mold passe,
Line 1820
Or he doutles shold degh for his derfe wordys.
Antenor vntomly turnet his way
Withoutyn lowtyng or lefe, lengit he noght,
But fast vppon fote ferkyt to shippe,
Line 1824
And hasted to the hegh see in a hond while;
Sailit on soundly as hym selfe lyket.
On dayes and derke nightes dryuyn on the ythes,
At Salame full sound þai set into hauyn.
Line 1828
That tyme in the towne was Telamon þe kyng,
To soiourne a season as hym selfe lyked.
Antenor arghly auntrid of ship
And wentto þat worthy his wille for to shew.
Line 1832
He welcomyt þat wegh with a wille feble,
ffor he louet not his lede of long tyme before:
Yet he fraynit at þat freike whedur he fare wolde, [folio 31a]
