fful hard hit were to vre bi-houe
Vch a prouerbe for to proue
Of þeos Auctours alle;
Line 171
Serteynliche wiþ-outen lees
Of sum of hem þen wol I sees
ffor þing þat may be-falle;
Line 174
Ȝif I drouȝ hem on lengþe,
I trou no mon schulde haue þe strengþe
To stonde and heere hem alle.
Line 177
Lewed men, and ȝe wol list,
fful fayn I wolde þat ȝe hit wist
On Crist whon ȝe schulde calle.
Line 180
To calle on Crist wiþ mylde chere,
Lewed Men, I schal ȝou lere.
Whon þat þe prest bi-ginnes,
Line 183
Whon he seiþ his Confiteore,
ffeire he louteþ þe Auter bi-fore,
To schriue him of his synnes.
Line 186
Serteynly, wiþ-oute delay
And ȝe for þe prest pray,
And he atte Masse ȝou mynne,
Line 189
Sikerli I dar wel say,
Þer nis no tonge þat telle may
What Mede þat ȝe may wynne.
Line 192
But ȝit I telle ȝou, sikerly:
And ȝe preye but only
ffor ȝor owne hele,
Line 195
I do ȝow to witen wiþ-outen drede
Ȝe beo not worþ so muche meede,
Not be þe haluendele,
Line 198
As þi kuynde puttes þe to
To don vuele he biddes þe do.
Ȝif þou wol wone in weole,
Line 201
Prey for þe prest, and he for þe:
Þat Is a preyere of charite,
Þen maiȝt þou synge of loue lele.
Line 204
Loue is trewe in vche a leede;
Ȝif þou do ille, vuel schalt þou spede
ffor al þe craftes þat þou con.
Line 207
