& also other seuen warkes of mercy gastly;
Line 1076
Thurgh trewe kepyng of any of this seuen
May a trewe cristen man wel come to heuen.
Sex bodely warkes has thou befor redde,
The [seuent] taght Tobie when he beryd the dede.
Seuen gastly warkes, that are of more mede,
Line 1081
May thou hald in thi mynd to thin awen spede:
The first is for to teche the vncunnand.
The second is to counsail the doutand.
Line 1084
The third is to confort him that is sorowful.
The ferth is to chasty him that is in synne wilful.
The fift is to forgif him that has ill wratthed the.
The sext is to support him that irksum is to the.
Line 1088
The seuent is to pray to god for all thes hertely,
That he amend thaim of thair faute thurgh his gret mercy.
¶ Of the paynes of hell. [The next passages are treated freely: most of the particulars are added.]
TVrne we now agayn, sum-what for to telle
Of the orrible paynes that ay are in helle.
Line 1092
Helle is a depe pit stynkand, with all myrknes:
Ther the dampned ay sal be halden in gret distres.
All that is in the warld of filth & of stynk,
At day of dome sal doun thedir synk,
Line 1096
ffor to eke thair stynkand payne, al be hit gret.
ffor ther sal be of hell-fire wondir huge hete;
That brennand fire with-outen ende so gretly hit glowes
That al the watur in the warld may not sloken his lowes.
Line 1100
Ther is als gret cold on another side:
Ther sudanly for more payne in to hit sal thei glide.
Thai sal noȝt haue no roume ther on be-side another,
Bot all be cast on a hepe as of turf a fother;
Line 1104
Ilkon sal stynk on other & double his payne,
& ilkon ay to greue other sall be ful fayne.
Ther sal be gnasting of teth for gretnes of payne,
And euer in the hert a sorowe souerayne
Line 1108
That thai haue lost for a litil lykyng of synne
The ioye of the siȝt of god that al godenes is Inne;
