Bot ay in him charite, mercy & meknes failes.
Line 964
Simple men sal he deceyue with miracles doyng,
Couetous with gret giftes, & gode with punysching,
He sal make men as god to adour his ymage
Line 967
& on thair [forehede] [a word om.: right hand or forehede, cf. Apoc. 13, 16.] bere a mark of his seruage;
Who-so has noȝt that mark, sal nouther bye ne sell,
Bot antecristes tyrant sal thaim to ded quell.
Be reson & in haly writ it is goddes sawe:
Thurgh payn sal god neuer stresse man to forsake his lawe,
Line 972
Bot what as any man dos here with his fre will,
Sal turne him, after it is, to gode or to ill.
Betwix antecristes comyng & his gret ill doyng
Sal Ely & Ennok com preche for mennes sauyng;
Line 976
Then antecrist sal sle thaim in Ierusalem,
& god sal raise thaim to lif & tak thaim to his leme.
Bot thre ȝere & a half sal antecrist haue maistry—
ffor to saue his chosen that ordayns goddes mercy.
Line 980
Then thurgh goddes myȝt sal that wikked be slayn,
& all chosen that trespast then sal turne agayn.
The[n] ful many Iewes sal turne to cristes lawe,
& halikirk sal liue in pes out of tyrantȝ awe,
Line 984
Shortir tyme or lenger, til that crist wil come,
To make the worldes ende & gif his grete dome.
¶ Of the day of dome.
IN the same fourme in whilk crist suffrid payn,
To deme both qwhik & ded he sal come agayn.
Line 988
Then sal he shewe his body stremand al on blode,
& his hert clouen in two as he henge on rode,
& say: "for ȝow suffred I al this gret payn.
Telles now what ȝe to me has done ther-agayn!"
Line 992
Allas, what may then til him synful man say
That neuer wele with-outen synne spendes on day?
Man sal ȝelde acompt then of al that god him sende,
Body & saul, witte & gode, how he has it spende,
Line 996
& of ilk a nydel word that euer he here spak;
In wikked word & wikked dede then sal be gret lak.
After that degre of synne or of charite
That any man dyes Inne, sal he domed be.
Line 1000
