And the ȝate of paradys was agayn thaim stoken,
Til ihesus with his passion hade made it open.
Line 788
When the fende sagh him wele on the crois hyngand,
He wend to haue made him forth ay in hell lengand;
Bot sone the saul with the godhede as a fere lyon
And a kyng of al the warld, & noȝt as a prison,
Line 792
Come to hell & brast thair barres with his will fre,
And toke out all anon with him that dyed in charite.
Him calles men a lord strong and myȝty
That has ay when he wil in batail the maistry.
Line 796
Sone he venquist the fend & cuttyd his power,
That he suld noȝt tempt vs more then we miȝt bere.
Thus is ihesus our refut, strenght & socour,
Our help & our hele, our ioye & our honour.
Line 800
¶ How crist is oure fader gastly.
HEre now how crist was oure formfader gastly,
Riȝt as adam was to man formfader fleschly.
All that was of adam born, lost heuen for his synne,
And all that cristes children will be bi him may hit wynne;
Line 804
Baptisme has the vertu of cristes hert-blode,
To make thaim his childer that wil take hit with [wil om.?] gode.
Thus riȝt as al men dyed thurgh adam,
So may al be quikned agayn in cristes name.
Line 808
Was neuer no fader that any son so dere hade boȝt
As crist, that man wesch of synne & out of prison broȝt.
In fourty houres after his ded herged he helle [[1 verse wanting.]]
Line 812
And apered to his disciples in many-maner wyse,
To proue soth that he said that he suld vprise.
He ete & drank with thaim ichon, riȝt in thair siȝt,
And spak that was nedeful to thaim, mekel of gastli liȝt.
And elleuen of thaim he blamed sithen
Line 817
ffor thei trowed noȝt that he was vprisen.
Bot it was til our faith ful heply
That Thomas of ynde trowed lattly,
Line 820
Til he in to crist[es] hert-wond hade put his hand;
Than said he: "thou art my god & my lord lyuand."
