Certes, lady, Symond swerd past thurgh-out thi hert,
And the paynes of thi sone were in the ful smert,
Line 676
That thi hert hade neuer lasted on non-kyn wyse
Hade thou noȝt trewed stedfastly that he suld vprise.
Lady, what nede was the for to make sorowe,
ffor thi sone dyed synful man to borowe?
Line 680
Thou wote that he sal ryse agayn thurgh his awen myȝt
& with a body ful of ioye, apertely to thi siȝt.
Thou wote the fend is venquist, & wetes it noȝt,
Til thi sone out of helle haue al his chosen broȝt. [folio 16]
ffro he dyed til he rose that [men] myȝt him se,
Line 685
Alle the trewth of halikerk was stedfast in the;
Alle his awen disciples of him thai were dredand,
Bot the faith in thi hert ay it was lastand.
Line 688
Dere lady, succour vs of dedly synnyng,
ffor the ioye that thou hade of his vprising!
¶ How ihesus is almyȝti. [Fr. deus omnipotent]
HE rose by his awne myȝt, & that verraily,
And shewed so that he was ihesus almyghti.
Line 692
He that al this warld made first of riȝt noȝt,
Man dampned agayn with his blode he boȝt.
Thus has he gyuen vs a gode counsail,
And thurgh riȝt venquist the fend in batail.
Line 696
His lyf has shewed vs a ful redy gate
ffor to entre, if we will, in-with heuen-ȝate.
ffor we sul traist on him in al oure nede,
He shewed vs the myȝt of god in his manhede.
Line 700
Power of god and man was mellid in his dedis,
And that to stablenes of oure treuth gretly spedis.
Riȝt as a sharp swerd of the fire al glowand
The egge kerues if he smyte, the hete is brennand,
Line 704
So godhede & manhede in o person
Shewed thair kyndnes [r. kyndes] to mannes reson.
We rede: when he was called til a weddyng,
Whan thaim failed wyne, sone at his bydding
Line 708
Thai filled pottes of clene water in the stede of wyne:
And thai were turned in to wyne, & that gode & fyne.
When he bad fette water, he shewed his manhed,
Line 711
And when he turned hit to wyne, he shewed his godhed.
