Bot more maruayl may who so can
How verraily is on bothe god & man.
Line 356
ffor he wald saue mankynde that fouly was lorn,
Child of a nerthly woman wald he be born.
Syn god in erth for loue of man wald mak his halle,
Nede it was to make it best & fairest of alle.
Line 360
¶ How ihesus entred in to a castil.
THer-for a castel has the king made at his devys,
That thar [= dar] neuer drede assaut of any enemys;
He sette hit on a whit roche thik & hegh,
With gode dykes al aboute, depe and dregh.
Line 364
Men may neuer with no craft this castil doun myne,
Ne may neuer do harme to hit no-maner engyne.
This castil is euer ful of loue & of grace,
To al that any nede has, socour & solace.
Line 368
ffour toures ay hit has & kernels fair,
Thre bailliees al-aboute that may noȝt apair.
Nouther hert may wele thinke ne tung may wel telle
Al the bounte & the bewte of this ilk castell!
Line 372
Seuen barbicans are sette so sekirly aboute
That no maner of shoting may greue fro with-oute.
This castel is paynted with-out with thre-maner colours:
Rede brennand colour is a-boue toward the fair tours,
Meyne colour is ymyddes of ynde & of blewe,
Line 377
Grene colour be the ground, that neuer changes hewe.
Thes colours both [MS. beth.] [fer] & nere castes so mekil liȝt,
That, when men behaldes thaim, comfort mekil thair siȝt.
Line 380
The castel al with-in, who-so may hit knawe,
Ay is blaunched als whit as any dryuen snawe.
ffour fair stremes in hit out of a welle springes
ffro myddes the hegh tour, thai fille the dykinges;
Line 384
So fair and so gode that liquour ther is
That he that drank oght therof myȝt haue mekel blis.
A chaier of yuor ther was sette in this ilk tour,
With seuen grees vpward, with worschipe & gret honour;
Was neuer non half so fair in this warld sene,
Line 389
Ne neuer non so semly hade prince ne quene;
