Ne neuer punist no wikkednes:
That is gretly agayns riȝtwisnes;
ffor he suld haue no mercy
That is dampned riȝtwysly."
Line 212
Here spak riȝtwysnes.
THen riȝtwisnes, the third sister, sayde:
"Dere fader, in me is all dome laide;
I ne may noȝt spare to say to the,
All that sothfastnes telles to me
Line 216
I mot dele to euer-ilk-one,
Gode or ill after thei haue done.
Thi wikkid seruant is in prison,
As he was demed with gret reson.
Line 220
I may noȝt fro this sentence vary
Bot I to riȝt wald be contrary.
Mercy ne pite is non [r. man?] worthi,
ffor that he lost thaim wilfully."—
Line 224
Alas catyf prison, now has thou no frende
Bot mercy, that praies for a gode ende!
Sothfastnes has accused the,
And riȝtwisnes has dampned the;
Line 228
Thou & all that of the come
To helle-fire has herd ȝour dome.
Thin enemy gret stired the to trespas,
And riȝtwisnes of the no mercy has,
Line 232
And mercy may noȝt be herd.
Ther-for pece may be ferd.
When no forgifnes may be,
Thai may noȝt dwelle in cuntre.
Line 236
All mankynde dyes and is put to payn,
Bot Enok and Ely that sal come agayn.
Gret dole is to think on this,
How al mankinde fordone is;
Line 240
Sothfastnes & riȝt has geuen thair iuggement,
Bot mercy & pees were noȝt of that assent.
If all go bi reddure of riȝt & sothfastnes,
How sall mercy and pes shewe the kinges godenes?
Line 244
If al be thaim one deme sothfastnes & riȝt,
Mercy, pete & pece sal loise al thair myȝt.
