So gret miht þer schal hit haue
Þat nouȝt aȝeynes hit schal quich nor quaue.
But trust nis non in worldes wele,
Nou art þou sek, nou art in hele,
Line 740
Nou artou pore, now artou riche—
Þe blisse of heuene nis þat not liche:
ffor þe meste part of þy Blis
Schal be sikernesse of al þis.
Line 744
Þe seueþe blisse: þi soule in heuene
Schal þonke God wiþ hiȝe steuene,
As Angeles don wiþ gret likynge,
"Holi, Holi, Holi" is heore syngynge.
Line 748
Of þe peynes of helle, & amonesting.
Hit is no neod now for to telle
More of þe peynes þat ben in helle.
In bodi & soule þei han gret nuye,
Of al þis Ioye þe contrarye.—
Line 752
Ȝif þou be-þenke þe, my dere frend, wel
Of al þis Ioye eueriche a del
Þat god haþ ordeyned for þi solace
Whon þou schalt sen him in his face,
Line 756
Þou hast gret Matere, sikerliche,
Him to loue souereynliche
Þat such knowynge and such wit
Ȝiueþ vs of him in holy writ.
Line 760
Nou hast þou matere of holy speche
Vnwysore þen þou for to teche;
And whon þou spekest wiþ eny mon
Þat more good con lere þen þou con,
Line 764
Sum of þeos Materes þou maiȝt enqwere,
Wel more good for to lere.—
Of þe þridde Manere of contemplacion in god him-self.
Tac hede nou & þou schalt se
Of Contemplacion þe þridde degre,
Line 768
Of God hym-self wiþ-outen doute,
Of Godhed wiþ-Inne, monhed wiþ-oute.
Þre þinges þou þenke, as I þe rede,
Of crist vr lord in his monhede:
Line 772
