Of þe Seuene blessynges of þe gospel, Seuene dedli Synnes remedie.
But of heore remedies nou wol I telle
Þat crist seiþ in þe holi gospelle.
Line 400
Þo ben þe benisouns seuene;
Aȝeyn þeose synnes þei ben ful euene.
"Þe Meke of spirit þei ben blest,
ffor heoren is þe Ioye þat euer schal last:"
Line 404
Þis Blessyng aȝeyn pride is riht,
Þat be-reueþ mon God almiȝt.
"Þe Mylde beþ [on erasure; r. ben] blessed þat loueþ no strif,
ffor þei schul haue þe lond of lyf":
Line 408
Aȝeynes Envye þat was sayd,
Of oþur mennes hauyng þat neuer was payd,
But of Mischef of his neiȝebore
He is glad, and of his lore.
Line 412
"Blessed ben þo þat Mournen I-wis
ffor heore frendes þat þei mys;
Þei schul ben cumforted wonder wel":
Aȝeynes wraþþe hit is sumdel,
Line 416
Þat discumforteþ mon him-selue
And þo abouten him, ten or twelue.
"Þe Merciful ben blessed, for-þi
God of hem schal haue merci":
Line 420
Þat is aȝeyn Couetyse,
Þat to þe nedful wol not diuyse.
"Þat hungren and þursten riȝtwysnesse,
Þei [MS. þat] [schul] ben fulled more and lesse":
Line 424
Aȝeyn þe Slowe þat nouȝt wol wirke;
Of alle gode dedes him þinkes irke.
"I-blessed ben alle of herte clene,
ffor godes owne face þei schul sene":
Line 428
Herof þe gloten may aske riȝt nouȝt,
ffor of his foule wombe is al his þouȝt.
"Þat louen pes þei blessed ben alle,
ffor Godes children men schul hem calle":
Line 432
Þe Lechour in herte he haþ no rest;
Of þis [r. pes] þerfore his part is lest.
