And þei sodun euerichon
In wellyng pich and Brumston;
Brennyng dragouns and serpentes ifere
Hongynge aboute heor nekkes were,
Line 136
Gnawyng hem, to don hem schom,
To-tere þe fflesch from þe bon.
And þer weore foure Angeles to telle
Þat weoren of þe hous of helle,
Line 140
Brennynge hornes hedde þei on hed;
Þei hem turmented and dude hem qued,
ffaste þei wente þis pepul a-boute
Wiþ moni turmentes grete and stoute,
Line 144
Seying to hem, as was heore wone:
"Knoweþ ȝe," þei seide, "godus sone,
Þe wȝuche þat muche on ȝou þouȝt,
Al þe world whon he bouȝt?
Line 148
ffor ȝe nolde neuer knowen him
Ȝe schullen han here þeos pynes grym."
Poul þis asked feire and wel.
And þenne onswered þe Aungel:
Line 152
"Þeos serued not chastite
Til tyme of heor weddynge schulde be,
But lyuede in heore lecherie,
And heled heore children and dude hem dye
Line 156
And ȝaf hem to swyn or to houndes
Or drouned hem In flodes groundes,
And schewed hem to þe worldus degre
As þei maydens hedden i-be;
Line 160
And in þis lyf þei lyueden ȝore
And duden no penaunce þerfore."
Aftur þis he sayȝ at ene
Men and wymmen moni and lene,
Line 164
Lene þei weore, wiþ-outen flesche;
Þei soffred harde and noþing nessche:
Muche lay bi-foren hem of Mete
Þat hem deynet not of to ete.
Line 168
Þo weore þeose þat weore not trewe
And nolde not faste þat hem was duwe,
And hedden of mony metes dedeyn,
But hit weore likerous, be certeyn.
Line 172
