Dublin
Now ayers he forth with hys Ereles, · to egip he wendes;
And clene all þe cuntree · when þai hys comyng harde,
Als he hed ben a hegh god · þai halden hym agayns,
Resaved hym with reuerence · & to þair realm ledyn.
Thare entrez hym þe Emperour · and in þat erth fyndez
Of anec hys awne syre · ane ymage of sabyll,
A berne was of blak stane · all þe body euen
Line 1127
With conyshaunce of kyngez · coron and septur in hand.
Than askys he þaim alexander · als he þar-on wates,
What maner of man vpon mold · þat was merkyd after?
"Sir, anec," quod all men · with a sterne steven,
"That þe erth of egipt · enhered some tyme."
Line 1132
With þat þe femand flode · flasshed in hys eghen, [folio 9a]
"That anec," quod þis athell kyng · "my awne fadre was."
Þan fallez he flatt on þe fold · & þe fote kyssez
Of þat stane þat stode · & stylly murnez.
Line 1136
Syne into surry with hys seggez · he soght þe ganest,
And þai as baratours bald · hym bigly withstandyn,
Set vppon hym sadly · & slew of hys knyghtez;
Bot ȝarle or he ȝode · þai ȝolde hym vp þe realm.
Line 1140
Than draue he so to Damask · with dokez & princez,
And sone he sesys all þat syde · and sy[do]ne he takez,
And þen he trussys hym to tyre · & þar hys tentes settes
Besyde þe site with a somme · & in a sege lengez.
Line 1144
Þair he lay with hys ledes · lange or he fondytt,
Before þe burgh with hys bernes · & muche bale suffred.
