Astadart flewe awey:
Gye hym folowed, per ma fay.
The lyght rabet bare hym awey:
Gye was sory, the sothe to say.
Line 2956
¶ Now ys Gye to hys felows went:
To the cyte they be lente.
In the cyte ys game and glee,
That the sarasyns scowmfet bee.
Line 2960
The emperowre sende aftur Gye
And hym honowred: he was worthy.
The emperowre seyde: 'be seynt Rogere,
I wyll the geue my doghter dere.
Line 2964
Thou art a man of grete valowre.
Ryght wolde, þou schuldest be emperowre.
All, that euyr be my mayne,
I wyll, that they bowe to the.'
Line 2968
¶ The steward sate at the borde
And was sory of that worde.
To Gye he had grete envye
And thoght to do hym trecherye.
Line 2972
Astadart rode towarde the ooste:
Moche was fallyn of hys boste.
In hys body he had a tronchon:
He helde hys honde on hys arson.
Line 2976
Bothe behynde and before
The blode ranne downe of hys gore.
Hys helme was leyde on the syde:
Hys schelde was smeten in pecys wyde.
Line 2980
Of the dethe he had grete care
And vnto the sowdan can he fare. [folio 180a:2]
The sowdan Astadart can see
And hys woundys, þat blody bee.
Line 2984
Quod the sowdan: 'what eyleth the?
Telle me, who hath woundyd the?'
Quod Astadart: 'y schall yow saye
Wyckyd tythyngys, be my fay.
Line 2988
