The romance of Guy of Warwick. The second or 15th-century version. Edited from the paper ms. Ff. 2. 38. in the University Library, Cambridge, by Dr. Julius Zupitza ...

Now dud Gye hele Tyrrye And kept hym wele and tendurlye. But Gye wolde telle no wyght, Fro whens he came nor what he hyȝt. Line 4680 Gye hym purueyde lechys gode And for hys loue chaungyd hys mode. In the cyte þey dwellyd longe, Tyll that Tyrrye was styffe and stronge Line 4684 And myght vpon an hors ryde: Howndys they had on euery syde. When he was hole, þere was game Betwene Gye and hym in same. Line 4688 They went to þe wode and to þe ryuere And louyd togedur on all manere. ¶ Fro huntyng as þey came vpon a day, Gye dud to Tyrrye saye: Line 4692 'Y haue the done curtesye, Whyll y haue dwellyd þus longe þe bye In thys londe and thys cuntre: All was for the loue of the. Line 4696 Wyll we nowe trowthe plyght And be felows day and nyght And, whyll þat we be leuande,

Nodur fayle odur in no lande?' Line 4700 ¶ Then bespake the erle Tyrrye: 'Syr,' he seyde, 'gramercye. Thys ys a grete specyalte, That ye wyll my felowe bee. Line 4704 God of heuyn geue me grace Yow to quyte in some place. Ȝyt þou art the trewest knyght, That euer slepyd in wynturs nyght. Line 4708 Ye had a wyckydde redde [folio 191a:2] For to saue me fro the dedde, But y yow louyd on all manere And seruyd [MS. serue.] yow, as my lorde dere: Line 4712 Y were ellys gretly to blame, As god schylde me fro schame.' ¶ Than the toon kyssed the todur And eyther dud, as other brodur Line 4716 To the cyte can they fare, As yoyfull men wythowten care. They be comen to ther ynne Wyth grete yoye and mekyll wynne. Line 4720 ¶ Gye dud make hys thynge yare: Into Ynglonde wolde he fare. Tyrrye he wolde wyth hym take And many odur for hys sake. Line 4724 To the kynge wolde he fare And entendyd to leue þere full yare He þoght of hym to haue honowre And ryche castels wyth many a towre. Line 4728 ¶ Gye in a wyndowe stode And spake to syr Tyrrye the gode Of hys passage ouyr the see And how he wolde wende to hys cuntre. Line 4732 Than came oon prekande ryght: He semyd full wele to be a knyght,

That had had grete trauayle. Gye hym askyd, wythowte fayle, Line 4736 Of whens he was and what tythande, What he hyght and of what lande And what he soght in that cuntre: 'Lye thou not, but telle mee.' Line 4740 ¶ He answeryd hym sone full wele: 'I schall the telle euery dele. Y wynde to seke syr Tyrrye, Of Gormoyse the erlys sone, sekurlye. Line 4744 I haue hym soght in many a cuntre. Also god haue parte of mee, I schall yow the sothe saye: [folio 191b:1] Of grete dole here ye may. Line 4748 Tyrrye seruyd dewke Loyere, And hym louyd and helde hym dere And dud hym grete honowre: He was a man of grete valowre. Line 4752 The dewke had a doghtur in bowre: Whyte sche was, as lylly flowre. The dewke Oton vpon a day Came for to wedde that maye. Line 4756 Than came Tyrrye, y yow say, And wyth strenkyth had hur away. They chasyd there Tyrrye longe And gaue hym there batell stronge. Line 4760 Many of them he broght to grownde Wyth yre in a lytull stownde. Whedur he be dedde, y wote noght: In many londys y haue hym soght. Line 4764 ¶ Then hym thoght the dewke Loyere Of Tyrryes fadur to venge hym þere. Grete oost he thedur broght: The dewke Oton forgate noght, Line 4768 He broght wyth hym a companye, Many oon of Lumbardye.

At Gormoyse y them lefte. The lande ys stroyed and all torefte: Line 4772 But y haue grace to fynde Tyrrye, That londe ys lorne, sekurlye. Hys fadur ys olde and whytehore: Hys strenkyth lassyth more and more.' Line 4776 ¶ 'Syr,' quod Gye, 'be god almyght, Thou schalt lenge wyth me alnyght. All, that y may, y schall þe wysse, Where that Tyrrye of Gormoyse ys.' Line 4780 Gye comawndyd hys meyne To resseyue the knyght so free. 'Leue syr,' quod Tyrrye to Gye, 'Of my fadur haue mercye. Line 4784 As we be felows plyght, Helpe my fadur wyth þy myght; For he hath grete mystere [folio 191b:2] Of vs now, that be here. Line 4788 Yf he be tane or euyll fare, I am dystroyed for euyr mare. Hyt were grete,' he seyde, [he seyde seems to be miswritten for some substantive.] 'for me And schame also, me thynkyþ, to the.' Line 4792 ¶ Quod Gye: 'Tyrrye, þou spekyst yn vayne. Thou woldyst neuer halfe so fayne Helpe thy fadur in hys mystere, As y wolde wyth my powere. Line 4796 I schall the neuyr fayle at nede, Whyll y may ryde on any stede.' 'Syr,' quod Tyrrye, 'gramercye. Now þou wylt go, y am merye.' Line 4800 ¶ Then sende Gye a messegere To Almayn to the emperere. [MS. Emperowre.] He sende hym knyȝtys bolde and wyght Fyve hundurd wele ydyght. Line 4804

Line 4804 'Tyrrye,' he seyde, 'make the redye For to helpe thy fadur in hye.' Than belyue þey were dyght: They reden bothe day and nyght. Line 4808 ¶ When they come to Gormoyse, [MS. Gorgomoyse.] There they harde moche noyse. They enturde in sone in haste, For they were nothynge agaste. Line 4812 Grete yoye had erle Awbrye Of hys sone, syr Tyrrye, And also of syr Gyowne, That was a nobull barowne. Line 4816 There he kyssyd erle Awbrye: For yoye he wepte, wytterlye. 'Dere fadur,' quod Tyrrye, 'On all thynge honowre Gye. Line 4820 Y wyll, that ye wete hyt ryght, That we be troutheplyght. He sauyd me fro þe deþe,' quod Tyrrye. 'God hym ȝylde,' quod erle Awbrye. Line 4824 'All, that ys in my lande, Schall be redy to hys hande, Cyte, castels, towne and towre: [folio 192a:1] I make hym maystyr wyth honowre. Line 4828 Y am now waxyn olde And vnmyghty and vnbolde: I wyll, he haue the maystry Of all thys lande, verylye.' Line 4832 ¶ Nowe be they in myddes þe cyte All wyth pryde and yolyte. They rose vp in the mornynge And made grete gederynge Line 4836 Before the erle Awbrye: There þey made a grete crye. Gye askyd oon in preuyte,

What was the noyce in þat cyte Line 4840 And wherefore þey made þat crye, That he harde, wytterlye. He seyde, hyt was dewke Loyere, That oftetyme had be here. Line 4844 'Of cheualre he hathe the flowre And therto grete socowre.' ¶ Then seyde anon syr Gye To hys feyre companye: Line 4848 'Lordyngys, y prey yow, arme yow sone Aȝenste þe yondur men we wyll gone.' 'Syr,' þey seyde, 'we be redye Aȝenste þem for to fyght in hye.' Line 4852 To hys ynnes dud he fare And armyd hym soone thare. ¶ When they were all redy dyght In a stedde togedur wyth helmes bryght, Line 4856 Quod Gye to Tyrrye: 'herkyn me, Two hundurd knyghtys take the The Lorens boldely to assayle. Loke, yowre hertys not afayle.' Line 4860 Tyrrye toke the knyghtys wyght Armed on ther stedys ryght. Forthe of the cyte dud he fare: To the ooste he came full yare. [folio 192a:2] Line 4864 There came prekynge before þe ooste A knyght wyth [MS. that.] mekull boste. Tyrrye hyt hym wyth hys spere, That hys hors fete myght hym not bere. Line 4868 A nother þere he woundyd depe: Schylde nor hawberk myght hym not kepe. Wyth strenkyth he smote hym thore, That on hys fete he yede no more. Line 4872 ¶ When Tyrrye sye hys men fyght, He slewe many a doghty knyght.

There lay in the felde slone In a whyle many oon. Line 4876 Boldelye faght syr Tyrrye And all hys feyre companye. Tyrrye smote the constabull Of hys stede, wythowte fabulle. Line 4880 He had hym wonne in that fyght, But þat þere came soone many a knyȝt: Icheoon soone vpon an hepe Abowte Tyrrye dud they lepe. Line 4884 He defendyd hym, as a nobull knyght: Many a hedde he smote of ryght. All he slewe, that were hym abowte, Were they neuer so bolde nor stowte. Line 4888 Gret angwysche to hym came þen; For soone he had lorne all hys men Thorowe the Lorens, þat abowte þem wende: There were slayne many an hende. Line 4892 What tane and what slone, Hys felows were awey euerychone. Tyrrye defendyd hym, as a lyon: Many an hedde he smote of, be my crowne; Line 4896 For lothe he was for to flee: He had wele leuyr slayne bee. ¶ Then seyde Harrowde to Gye: 'Se ye not syr Tyrrye? Line 4900 He ys a nobull knyght: [folio 192b:1] But yowreselfe, þer ys none so wyght. Helpe hym,' he seyde, 'pur charyte: Hyt ys tyme, so mote y thee.' Line 4904 Then hyed he forthe a gode spede To helpe Tyrrye in hys nede. ¶ Now comyth Gye to that batayle: The Lorens sone dud hym assayle. Line 4908 Sone Gye smote Gayere, The dewkys cosyn Loyere.

He smote hym downe wyth hys spere And he hym toke, as falleth to were. Line 4912 Gye to a nodur rode: Hys spere þorow the body glode. He smote a nodur, so dud he moo: Many he made to dethe goo. Line 4916 Then þey smote togedur thare: Ther wolde none of them odur spare. There dyed many a knyght, That were bolde, hardy and wyght. Line 4920 Who so had sene Gye And wyth hym Harrowde and Tyrrye, There they dud that ylke day, That hyt ys wondur for to say. Line 4924 Of Lorens grete plente Dyed that day ryght in hye. ¶ Gye the constabull hyt thare, That of hys hors he hym bare. Line 4928 He toke hym than in þat batayle. The Lorens flewe, wythowten fayle: Gye and Tyrrye chasyd faste. All the Lorens at the laste Line 4932 Were woundyd and slone that day: Vnnethe xxx^ti passyd away. Gye wente home and Tyrrye Wyth ther gode companye. Line 4936 ¶ Then þer came a messengere Faste to dewke Loyere. 'Syr,' he seyde, 'herkyn to mee. Loke, þou thynke vengyd to bee. [folio 192b:2] Line 4940 In the mornynge to day To the cyte we toke þe way Wyth fyve hundurd knyghtys wyght, And euyll chawnce came to vs ryght. Line 4944 All we be takyn and slayne: Ther be not xxx^ti comen agayne.

There ys comen syr Tyrrye And wyth hym þe doghty Gye Line 4948 And a knyght of grete pryce; Harrowde of Ardyrne hys name ys. All they be wyght and bolde: Thorow þem owre knyȝtys are colde. Line 4952 ¶ Then seyde the dewke: 'ys þat no lye, That to þem ys comen Tyrrye and Gye And Harrowde, that ys so wyght, Then we go to schame anon ryght.' Line 4956