The sarsyns hyed þem full faste
Aftur Gye, when he was paste.
Gye to take they were preste: [folio 185a:1]
Many a man dud hys beste.
Line 3724
Gye rode to a roche of stone:
The paynyms folowde hym euerychone.
Ofte he turned them ageyne:
Many of them hath he slayne.
Line 3728
Ther was neuer ȝyt man on grounde,
That durste agenste so many stonde.
Now of Harrowde wyll we speke:
For sorowe, he þoȝt, hys herte dud breke.
Line 3732
He haþe so moche sorowe and woo,
That he may not oon fote goo.
For Gye all þat sorowe hath he:
He wende, he schulde hym neuer see.
Line 3736
'Alas, Gye,' syr Harrowde seyde,
'That þou were so fowle betrayed.
Now wott y wele, wythowten drede,
I schall hym neuer see on stede.
Line 3740
Then were y schente: what shall y doo?
I haue no man to moone me too.'
¶ As he was in sorowe and dud wepe,
Vppon hys bedd he felle on slepe.
Line 3744
He can mete a straunge swevon:
He thoght, he sawe syr Gyowne
On a stede faste syttande
And a scharpe spere in hys hande.
Line 3748
Lyons and lebardes assayled hym faste,
That had made hym sore agaste.
Hys schylde was brokyn euyn in two,
And hys hawberke was reuyn also.
Line 3752
Wyth moche pyne he helde hys lyfe:
He was in so moche stryfe.
¶ When Harrowde of hys slepe dud wake,
For drede faste can he quake.
Line 3756
