Off my fadre I nouȝt conceyued
But flesche ful frel, & fayn to falle.
Line 44
And sithe þi flesche, lord, was furst perceyued,
And for oure sake laide streiȝt in stalle,
Was neuer synful man deceyued,
That to þi mercy woldë calle.
Line 48
(7) Ecce enim ueritatem dilexisti: incerta & occulta sapiencie tue manifestasti michi.
Lo! þou hast louyd ryȝt,
And schewid me counceil of þi wyt,
How, þorw mercy & þorw myȝt,
Two kyndës ben to-gidre knyt:
Line 52
Thral ys fre, & knaue is knyȝt,
And god is man, as gospel wryt;
And ȝit my soule in perel be pyȝt,
Mercyful god, help þou yt!
Line 56
(8) Asperges me ysopo, & mundabor: lauabis me, & super niuem dealbabor. [folio 98]
With holi water þou schalt me springe,
And as þe snowe I schal be whyt;
And ȝif my soule in synnë stynke,
With wepinge water I may it quyt.
Line 60
Dedly drauȝtes al-þouȝ I drynke,
Of répentaunce ȝyue me respit;
For who-so on þi þrowës þynke,
In worldës welþe is no delit.
Line 64
(9) Auditui meo gaudium & leticiam: et exultabunt ossa humiliata.
To myn heryng þou schalt ȝyue
Gladnesse, to gladë bonës meke.
In lownesse lernë me to lyue,
Leuë lord, I þee by-seke!
Line 68
