(77)
¶ Þou scornest, and penaunce doist þou noon
For þi synne, but þin herte be soor;
For wordli losse þou makist moone,
Þou siȝest and sorewist myche þerfore.
Line 656
And if þi body were woo bigoon,
What bittir medecyn ȝeuen þee wore,
Ioiyngly þou woldist it take anoon,
Thi bodily helë þee to restore.
Line 660
(78)
¶ Þi soule with synne is goostly slayn, [page 220]
And þou withoute sorewe þi synnë tellis,
To do such penaunce, þou art not fayn,
As þi schrift-fadir þee councellis.
Line 664
Thou wolt neuere restore agayn
Fals-goten good þat þou wiþ mellis:
Man, þou must þerfore suffre payn
For þi synnes, heere or sumwhere ellis.
Line 668
(79)
¶ It is impossible, and may not be,
To passe fro ioie to ioie: for thi,
Take þi crosse to þee, and folewe me,
If þou wolt to my blis up stiȝe.
Line 672
Greet sijknesse and al aduersite,
What-so-euere comeþ, suffre paciently;
Hate alway synne, and euere it flee,
And, man, make amendis or þou die."
Line 676
(80)
(Man's Tenth Answer.)
"LOrd, ȝeue me grace amendis to make,
For of my silf me failiþ poweer:
Synne þat is deedli y wole forsake,
And to do deedis þat worþi merite weere.
Line 680
In þis world sende me woo & wrake
For synnis þat y haue doon ful seere: [page 221]
Who haþ no desese, heere he may quake;
Hem þat þou louest, þou chastisist heere.
Line 684
