(29)
¶ "If þou ȝeue for my love a ferþinge,
Þou doist it with an heuy harte;
In almesse þou darist ȝeue no þing
For drede þou schuldist falle in pouerte.
Line 272
In wordis and in veyn spekynge,
what euere þou waastist, þou myrie art;
Of such y wole haue rekenynge;
On doomysday þou schalt not starte.
Line 276
(30)
¶ "Þanne schalt þou ȝeue acountis ful streite,
How þou come to þi good, euery deel,
Wheþir þou it wan with trouþe or with disceite,
And how þou spendist it, yuel or weel.
Line 280
Noon oþer grace þanne aftir waite; [page 201]
For, as þou hast wrouȝte, so schalt þou feele.
What schal þanne profite þi gowne y-pleite,
Poundis or markis þat ȝe of þe peple peele?
Line 284
(31)
¶ "A clene conscience schal in þat day
More profite, & be more sett by,
Þan al þe muk & þe money
þat euere was or schal be, vndir þe sky.
Line 288
Þanne wole not helpe to plete ne pray;
þerfore, as riȝt wole, þanne deme schal y:
And þer-fore, man, whilis þou may,
Man, make amendis or þou die."
Line 292
(32)
(Man's Fourth Answer.)
"I Woot weel, lord, from ȝeer to ȝeer [Man.]
Ful greetli greeued þee y haue;
Þat y wolde neer þi mercy were,
My modirs wombe had be my graue.
Line 296
For what profitiþ my lyuynge heere,
But y myȝte aftirward be saaf?
But ihesu, as þou bouȝtist me deere,
Lete not my soule come in helle caaf!
Line 300
