Goddis owne complaynt.
"WHI ART THOU TO THI FREEND VNKINDE?"
[Lambeth MS. 853, ab. 1430 A.D., page 81, written without breaks.]
(1)
(Christ's First Complaint against Man.)
This is goddis owne complaynt
To euery man þat he haþ bouȝt,
And þus he seiþ to hem ataynt,
"Myne ownë peple, what han ȝe wrouȝt,
Line 4
¶ Þou þat to me art so faynt,
And y þi loue so fer haue souȝt?
In þine answere no þing þou paynt
To me; for whi, y knowe þi þouȝt.
Line 8
¶ Haue y not doon al þat me ouȝt?
Haue y left ony þyng bihynde?
Whi wraþþist þou me? y greue þee nouȝt;
Whi art þou to þi freend vnkinde?
Line 12
(2)
I schewid þee loue, & þat was sene
Whanne y made þee lijk to me;
On erþe my werkis [page 82] boþe quycke & grene,
I putte hem vndir in þi poste.
Line 16
And fro farao—þat was so kene—
Of egipt y delyuered þee,
I killid him & hise bidene.
Þe reed see atwo to flee
Line 20
¶ I bad, þat drie it schuldë be;
I ceessid þe watir & þe wynde,
I ledde þe ouer, & made þee free:
Whi art þou to þi freend vnkinde?
Line 24
