(35)
"yff þou yeve for my love A ferthyng,
thowe doest hit with An hevy harte;
In almys dar þou Do nothyng
for Drede þou fallë in pouerte,
Line 276
In wordis and in vayne spekyng,
what-euer þou wastyst, mery þou arte;
Of suche I wole haue Rekenyng;
A Domys day þou shalt not starte.
Line 280
(36)
"than shalt þou yeve A-counte full strayte,
howe thowe come by thy goode, eche dele,
whedur with trouthë or Dyssayte,
And howe þou spendyst hit, evyll or wele.
Line 284
Noone odyr grace than afftyr wayte:
As þou haste wrought, so shalt þou fele.
what shall than prophyte þi gowne purfylled?
Poundes and markes of the I peele.
Line 288
(37)
"A clene conscyence shall þat daye
More prophyte be, & more sett bye,
than all thy muke and alle þy moneye
that euer was, or shall be vndyr þe skye.
Line 292
than wole nat helpë plete nor playe,
for ar Right-wole than Deme shall I;
And there-for, whylë þat þou may,
Make Amendis or þou dye."
Line 296
(38)
(Man's Fourth Answer.)
"I wote wele, lorde, frome yere to yere
full gretely grevyd the, I have;
that I wete wele; nor, þy mercy were,
My modyrs wombe hade be my grave.
Line 300
for what profyttythe my levyng here
But þou wolt affter-warde me save?
But Ihesu, as þou boughttest me dere,
Leve nat my soulë in hellë Cave!
Line 304
