(31)
"I haue mysspendyd my yonge age
In synne, and wantonnehed also,
I have been slowe and lovyd outerage;
A gloton, A lechur, I was bothe to.
Line 244
I am worthy noon odyr wage
But for to dwell in eendeles woo;
Alas! why haue I been so outerage,
And servyd the fende þat was my Foo?
Line 248
(32)
¶ "But, lorde, in holy wrytt Rede wee
that þou for-sakyst no wrechchyd wyght
that leuythe his syn and turnythe to the,
And I to the turne have tyght.
Line 252
ffull prowde and Rebell haue I been,
But I wele meke me to my myght,
frome hens forwarde I purpose me
A-yenst myn ownë flesche to fyght.
Line 256
(33)
"My Flesche to fellë I wole faste,
My louys to travell I wole sende,
And thorowe thy grace I am nat A-gast,
what sorowe or sykenes to me þou sende,
Line 260
to suffyr whyle my lyffe wole laste;
for vttyrly to this Entent,
to ponysche þat I haue trespassed,
Mercy, Ihesu, I wole Amende."
Line 264
(34)
(Christ's Fourth Complaint.)
"Man, I haue sende þe syluer & gollde,
And alle the welthe within þy woone,
to susteyne the and thyn houssolde,
And with the Resedewe many one
Line 268
tho myghttyst þou haue yonge and olde
that been diseassyd and woo-by-goone;
My servauntis suffyr hunger and colde, [folio 149]
Releffe of the yeet haue I noone.
Line 272
