(16)
In my baptym I mayde beheste
þe for to serue lelely & wele;
Of þi seruyse oft hafe I seste,
with synnes thowsandes serued vnsele;
Line 124
Bot þi mercy nedes moste be sene
þer moste synn is & wyckededede;
þe moste synful I am, I wene;
Ihesu, mercy for my myse dede!
Line 128
(17)
For synful man walde þou be borne;
for ryghtwys not þou wil recorde;
when man had synnede, he was forlorne,
& þan him kyndely þou restorde;
Line 132
þou sufferde paynes corōnde with thorne,
nakede with outen clath or schrede,
with mykel sorue þi body torne:
Ihesu, mercy for my mysdede!
Line 136
(18)
Þou art my hope, my way ful sure,
ay lastande hele, both streng[t]h & pese;
þou art pyte þat ay sal dure;
þou art gudenes þat neuer sal sese;
Line 140
þou art clennes, both mylde & mure;
me þe displese, ihesu, for bede,
Als þou was borne of virgyne [folio 55] pure:
ihesu, mercy for my myse dede.
Line 144
(19)
Þou byddes ilke man ȝelde gud for ille,
not il for il to ȝelde agayne;
þan I beseke þe þat þou wil
graunt me mercy in stede of payne!
Line 148
þou me forgyfe, & mercy graunt,
& in my saule þou sawe þi sede,
þat I may, lorde, make myne auaunt:
Ihesu, mercy for my myse dede!
Line 152
