Ihesu spak wiþ wordis breue,
"Come hidir, thomas, & speke me to;
Line 436
¶ For here þou maist now þe sooþe preue, [page 179]
How þat y on þe roode was y-doo;
And he þat wille not on it bileeue,
Schal be dampned to peine for euermo."
Line 440
¶ Þanne seide ihesu wiþ myelde speche
To hise disciplis, "y wole ȝe goo
To alle creaturis aboute, to preche
Myn uprisynge, to freende & foo;
Line 444
¶ And þo þat bileeuen þat ȝe teeche,
Bodies and soulis saued ben thoo;
And þo þat bileeuen not, y seie to eche,
Þo schulen for euere to peine goo.
Line 448
¶ From ȝou, feendis schulen flee for my name;
Eddris & venym schal from ȝou steele;
Þouȝ ȝe drinke poisoun, it schal not ȝou tame,
Neiþer harme ȝou, ne noo greef feele.
Line 452
¶ I schal newe tungis in ȝou frame
Alle maner of langagis forþ to deele;
And þo þat ȝe touche, sike or lame,
Body and soule y wole hem heele."
Line 456
¶ Oure lord, aftir his resurreccioun, here [page 180]
In erþe he was forsoþe dwellynge
Til hooly þursday comen were,
Þat he stiȝ to heuene, where he is king.
Line 460
¶ At þe dreedful doom, wiþ-out lesing,
Boþe quycke and deede þere schal he deme.
God ȝeue us grace in oure lyuynge
To serue oure god, & marie to qweeme.
Line 464
¶ Of alle þe children þat euere were borun,
Saue oonli crist him silf a-loone,
