I took þee my seete ful stille,
It to ȝeme þou were ful prest;
Line 340
¶ And while y wente where me list,
And come aȝen a-noon in hiȝe,
Þou seidist þat þou were worþiest,
And to sitte þere as weel as y;
Line 344
¶ And þou repentidist þee neuermore,
But euere aggregidist þi trespas.
Adam wepte & siȝede soore,
And askid mercy & oile of grace;
Line 348
¶ My fadir sende me hidir þerfore,
Vpon a tree leete deeþ me chase,
A spere þoruȝ myn herte gan boore,
& leete out þe derworþiest oile þat euere was.
Line 352
¶ In my fadris name of heuene
Opene þe ȝatis aȝens me!"
As liȝt of leite, and þundir leeme,
Þe ȝatis to-burste, and gan to flee;
Line 356
¶ God took out adam and eue ful euene, [page 175]
And alle hise chosen companye.
Þe prophetis seiden with mylde steuene,
"A song of wondris now synge we."
Line 360
¶ "A, ha!" seide Adam, "my god y se;
He þat made me wiþ his hond!"
"I se," seide noe, "where comeþ hee
Þat sauede me boþe on watir & londe!"
Line 364
¶ Quod abraham, "y se my god so free
Þat sauede my sone fro bittir bande!"
Þo seide moyses, "þese tablis he bitook me
His lawe to preche and vndirstande!"
Line 368
¶ Quod Dauid, "we spoken of oon so grym
Þat schulde breke þe brasen ȝatis."
