Se what oure Lord Suffride for oure Sake.
[Pages 117-120, written without breaks.]
BOthe ȝonge & oolde, wheþir ȝe be,
in cristis name good cheer ȝe make,
and liftiþ up ȝoure hertis, & se
What oure lord suffride for oure sake.
Line 4
as meeke as ony lombe was he,
ensaumple of him weel mowe we take,
& to suffre also in oure degre,
& in his seruice euere to wake.
Line 8
And if oure freendis forsake us heere
so þat we be left al aloone,
Þinke on ihesus þat bouȝt us dere,
& to him make we al oure moone;
Line 12
¶ For of þat lord weel may we leere
What wrong he suffride among hise foon;
Whanne hise disciplis fledden for feer,
Þer bood no mo but marie & iohne.
Line 16
If ony wrong to us be wrouȝt,
Be it in word eiþer in dede,
Be of good hope ȝit in þi þouȝt
How god may us helpe alle at neede, [page 118]
Line 20
And þinke we how ihesus crist us bouȝt,
& for oure synnis hise blood wolde blede;
for his owne gilt was it nouȝt,
for he dide neuere synful dede.
Line 24
