¶ Loue is hetter þan þe cole
To hem þat of it is fayn & frike,
Þe flawme of loue, who myȝte it þole,
If it were euermore lijke:
Line 28
¶ Loue us heliþ, & makiþ in qwart,
And liftiþ us up in-to heuene-riche,
And loue rauischiþ crist in-to oure herte,
I woot nowhere no loue it is lijke.
Line 32
¶ Leerne to loue if þou wolt lyue
Whanne þou schalt hens fare;
Al þi þouȝt to him þou ȝeue
Þat may þee kepe from care;
Line 36
¶ Loke þou þin herte fro him not twynne
Þouȝ þou wandre euery where,
So þou may weelde him with-inne,
And loue him hertili euermore.
Line 40
Ihesu, þat me loue hast lende, [page 92]
In-to þi loue þou me bringe,
Take to þee al [al in margin.] myn entente
Þat þou be to me myn ȝerninge,
Line 44
¶ And þat synne from me awei were went,
And loue come myn owne coueitynge,
Þat my soule hadde herd & hent
Þe songe of þi sweete louynge.
Line 48
¶ Þi loue is to us euerelastynge
Fro þat tyme þat we may it verrili fele,
Þerinne make we euere brennynge,
Þat no þing may it uerrili keele.
Line 52
¶ Mi þouȝt, take it into þin hand,
And stable þou it ilke a dele,
Þat y be no þing hildande
To loue uerrili þe worldis wele.
Line 56
