Page 43
[Of the name Adam, and of Paradise.]
¶ Adam was made of mannes elde
As he myȝte him seluen welde
As austyn seiþ þat heþ nouȝt
Line 587
And wiþouten paradis wrouȝt
Here mow ȝe resoun of his name
Whi he was calde Adame
In þis name are foure lettres leide
þat of þe foure ȝatis be seide
Line 592
As eest. west. norþ. & souþe
So mychel is Adam for to mouþe
And þou maist aske wiþouten blame
Whi god him ȝaf so greet a name
For soþe þat is liȝte to rede
Line 597
Hit tokeneþ Adam & his sede
Ouer al þe world shulde be sprad
And þerof to be lord mad
Line 600
And as oure lord had heuen in honde
So shulde man be lord of londe
þerfore he ȝaf him to bigynne
A lussum lond to dwellen Inne
Line 604
A lond of lif ioyes & delices
Whiche men callen paradis
Into þat londe þat swete plas
Was adam brouȝte when he made was
He ȝaf hit him as heritage
Line 609
To ȝelde þerfore no knowlage
But to holde hit wel vnbroken [MS. vnbrokon]
A forbode bitwene hem spoken
But for þat he helde hit nouȝt
Line 613
He made vs alle in bale be brouȝt
In care he brouȝte vs & in sore
As I shal telle ȝou furþermore
Line 616