Cursor mundi (The cursur o the world). A Northumbrian poem of the XIVth century in four versions. Ed. by the Rev. Richard Morris ...

[The State of the World after Domesday.]

¶ Of blis & ioye haue ȝe herd Now shal I telle of þe werd Line 23654 Þat fordone is & al fordryuen Aftir þat doom is ȝyuen Hit shal be brent so depe & dryȝe As noe flood was vp on hyȝe Line 23658 Þenne shal hit haue a shap al newe Euermore to stonde trewe Alle þe elementis þat we se Þei shulen alle clensed be Line 23662 Þat now be stiryng alle shal stonde Shal þenne be no peyne in londe Suche as we now vche day are Inne Þat god setteþ for oure synne Line 23666 Of hete ny colde reyn nor wynde Shal þenne be no storme to fynde No miste no merke in no manere Of wedir þis world for to dere Line 23670 And as oure bodres þat we here bere Ben feirere þen þei euer were So þis world shal haue newe shroud Had hit neuer noon so proud Line 23674 An hundride siþe of feirere hewe Heuen & erþe shal be made newe Sonne & mone sterre & lift Þat bi strengþe be now shift Line 23678 Alle wattres now rennyng wete Shul be in bettur astate to mete Fro þat tyme shul þei stille stonde Wiþ muchel blis to be lastonde Line 23682 Þe sonne shal haue scripture sayes Þe briȝtenes þenne of seuen dayes Þe watir þat wett cristis flesshe And bi bapteme his seyntis wesshe Line 23686

Line 23686 Fro þat tyme ouer passe hit shal Þe shene shynyng cristal Line 23688 Þe erþe þat cristis cors in bred Of paradis shal ben a sted And for sumtyme made reed hit was Wiþ seintis blood shed in plas Hit shal be filled wiþ mony floures Line 23693 Swete smellyng of dyuerse colouris Þat neuermore shal falle ne dwyne But as paradis shal shyne Þe erþe þat furste was malediȝt Line 23697 To þornes for oure eldres pliȝt Þenne shal hit blessed be & quyte Of labour sorwe & of wite Line 23700 Neuermore from þat day Knowe of harmes none hit may Þus shal he make hit stande Þe lord þat is al weldande. Line 23704