Cursor mundi (The cursur o the world). A Northumbrian poem of the XIVth century in four versions. Ed. by the Rev. Richard Morris ...

[The State of the World after Domesday.]

[O]f blis and beild nu haf ȝe herd, Nu sal i tell ȝu of þe werld, Line 23654 þat sua for-don was and fordriuen Efter þat þe dome be giuen. It sal be brint sua depe an drey Als noei flode ras vp on hei, Line 23658 And þan sal haue a schap all neu, Euer mar to stand in treu; All þe elementes þat we se, þan þai sal all clenged be, Line 23662 þat nu er stirand all sal stand, Sal þar-be þan na pine in land, Als we er nu ilk dai in, þat godd has sett vs for vr sin. Line 23666 Als hate and cald, raine and wind, [folio 157b:1] Sal þar be þan na storm to find, Na mist ne mirk, ne na maner Of weder to þis werld to dere; Line 23670 Als all vr bodijs þat we here bare, Bes fairer þan þen euer was are, Alsua þis werld sal neu haue schrud, þat had it neuer nan sua prude. Line 23674 An hundreth sith of fairer heu, Bath heuen and erd sal be mad nu; Sunn and mone, stern and lift, þat ai wid stiring er nu schift, Line 23678 And watris renand alwais wate, Gernand be in better state, Fra þat time still þan sal þai stand, wid farli blis to be lastand. Line 23682 [þ]e sunn sal haue, þe scriptur sais, þe lightnes þan of seuen days, [þ]e water þat wett cristes fless, Ani baptim his santes wess, Line 23686

Line 23686 Fra þat time forth ouer pas it sal þe schene schining of cristal. Line 23688 [þ]e erd þat cristes cors in-bredd Of paradis sal be a stedd, And for it was quilum made rede, wid blod of santes þar-on sched, It sal be fild wid mani flours, Line 23693 Smelland suete wid mani colurs; þat neuer mare sal dim ne duine, Bot als paradis sal it schine. þat erd, þat first was maledight Line 23697 To thornes for vr eldrin plight, þan sal it blisced be and quite Of labur, of soru, and of site; Line 23700 Ne neuermar fra þat day Ne bes þar-in wa harmes ay, And þus-gate sal he schift his hand, Or lauerd þat es ay lastand. Line 23704