pride reuis men gode & his maistri.
wraþ reuis him-self his broþer enuy.
Of wraþ þer risis redi boun.
Line 27728
missagh & flitte & malisoun.
wrange fareden banning vp-braide.
baþ nyendis god & man is saide.
þrete & buffettis & mani a dint.
Line 27732
bolning of hert & resoun tint.
vn-hende talking of dide outrage
latis misledde liȝtnes of rage.
Line 27735
aþis grete & muche sklaundere.
alle of wraþ comis þer.
¶ wraþ hit is a braþe on-falle.
Line 27738
menging of mode þat comis of galle.
hit is a crewel þing & crouse.
þat droues mani man in hous.
fliting shindis & misdemis.
Line 27742
man awen witte hit fra him flemis.
& reuis man of bodi his miȝt.
& makis him blinde in his insiȝt.
of loue riueli hit brekis bande.
Line 27746
& lettis consail for to stande.
hit turnis man fra goddis wille.
& makis him derfe to didis ille.
hit lesis life & na pite.
Line 27750
mai þer hit lendis fundin be.
¶ hateretin hit is & ne ful strange
þat has in hert bene haldin lange.
& oft-siþe hit has bene soȝt.
Line 27754
quen wikked wil hit forþ has broȝt
Againe þis synne is gode to take.
wele to suffre for cristis sake.
Line 27757
