[The story of David is finished.]
¶ Nu es godd turn til vr stile,
þat we haf gan vte of a quile,
Line 8510
And tell apon vr mikel tale,
For to make vr stori hale.
þis dauid, þat i rede of here,
Line 8513
Was king and regn[ed] fourte yere,
His regnning was wit right resun;
Gains him his fas had na fusun.
Childer had he wit wijfes sere
O quilk i mak no mining here.
Line 8518
For he þat mikel has for to tell
þe scortliker he aght to spell.
þis ilk it was þe king daui
þat mikel spak o propheci,
Line 8522
O cristes birth sua lang be-forn,
þat of a maiden suld be born.
þat maiden of his aun sede
Was geten, als in bok we rede,
Line 8526
And þat vr lauerd him forwit hight
Of him suld spring þat all suld right.