And holde þi lyf and his,
If þou suffre him fare amis,
In þat point and þou dye
And þou it wiþ þin eye [Sinn? Entstellt!] —
Be þe hed þat I bere,
Of his deth þou shalt answere.
Þe laste comaundement of ten
Þat god comaunded alle men:
Coueite non oþer mannes wif
Forto apeire here beiþer lif.
Coueite not his wif alone
Ne his oþere godes none
Ne no wif, oþeres spouse,
Ne no goed þat falleþ to house.
Nou haue ȝe herd, wymmen and men,
God almyhties hestes ten.
I haue told ȝou no falsnesse,
Bot þat þe bok bereþ witnesse.
Bot þer nis nouþer ȝong ne old
Þat of articles þat I haue told
Þat may wite him wiþ hem alle,
Þat he ne shal in somme falle.
We beo so feble sikerliche,
We mote sinnen nedeliche.
Bot godes mercy is so myche,
Þat, þei we sinne dedliche,
Est and west, norþ and souht,
God haþ ordeined shrift of mouþ.
Þei man falle, he shal arise
And turne aȝein to his seruise.
Þer nis man so holy non
Mad of flessh and of bon,
Þat so wel loke him may,
Þat he ne falleþ seuen siþe a day.
God lene vs sone rise
And ende in his suete seruise. Amen.
