7. Et occursus eius vsque ad summum eius: nec est qui se abscondat a calore eius. ¶ And his gaynras [S ogeyne goynge.] til the heghest of him; nan is that him may hide fra his hete. ¶ That is, he stegh in til heuen, til the euenhede and ioy of his fadere. and swa he suffirs nan to be that may excuse thaim of the hete of his luf: for he has shewid luf til all. for noman may excuse him. 'that he ne is sum tyme stird fra synn to gode [S om. 'that he—to gode.'] .'
8. Lex domini immaculata conuertens animas: testi|monium domini fidele sapienciam prestans paruulis. ¶ The laghe of lord vnwemmyd, turnand saules; the witnessynge of lord trew, wisdome gifand til smale. ¶ Clen is the laghe of oure lord: for it is soth in all thynge, and it forbedis all ill thynge: tornand saules til god, what for dred what for luf. and it is godis witnessynge, gifand wisdome, that is sauoure of heuen til smale, that is til meke, noght till proude.
9. Iusticie domini recte, letificantes corda: preceptum domini lucidum, illuminans oculos. ¶ The rightwisnesis of lord. right, gladand hertes; the comaundment of lord shynand, lightenand eghen. ¶ Right ere his rightwisnesis, that is his laghe, that makis thaim rightwis that kepis it. gladand hertis in hope of endles blis. the comaundment of god is shynand, that is charite, that makis the eghen of oure saule lyght and lufly.
10. Timor domini sanctus, permanet in seculum seculi: iudicia domini vera iustificata in semet ipsa. ¶ The dred of lord haly, dwellis in world of warld; the domes of lord soth, rightwisid in thaim self. ¶ The dred of god is haly in vs when we dred noght to be punyscht, bot to wreth him, or be departid fra hym. and the froit of this dred lastis ay. and the domes of oure lord ere soth. for whether he manaunce or he hete. he desaifis na man: and thai ere rightwisid in thaim self. for thai haf na nede of any other auctorite than godis, that thai be halden ferme.
11. Dedsiderabilia super aurum & lapidem preciosum multum: & dulciora super mel & fauum. ¶ Desiderabile abouen gold and preciouse stane; and swetter abouen huny & huny kambe. ¶ That is at say, the domes of god ere desiderabile abouen all riches: that is takynd bi gold. and myght, that is takynd by the preciouse stane. and lust of fleysse, that is takynd by the huny. and the huny kambe. aswha say, mare ere to luf the domes of god. than
