sundird the proud. that is, tho that sekys the way of heghnes abouen other. fro the thouȝt of thair hert. that thei myȝt not do in dede the wykkidnes that thei conceyfyd in thair wille.
7. Deposuit potentes de sede: & exaltauit humiles. ¶ He did downe the myȝty of setyl: and he heghid the meke. ¶ The myȝty, that is, tho that ioyes in thair myȝt, & vsys hit wrang and wykkydly, he did downe of setil of thair dignyte & honour: that thair last wrechidnes be to vmthink of thair state before: and he heghid til the setil of aungels felyschip. the meke; that is, tho that holdys nothing lowgher then thaim self. and gifis thaim to be defoulyd of all that will. as erth is. & tharfore thei ar worthi to be heghid. for that gret mekenes. that thei are not stird til wrath, of men sey thaim ill or do thaim ill.
8. Esurientes impleuit bonis: & diuites dimisit inanes. ¶ The hungirand he fulfild of godes; and the ryche he laft tome. ¶ The hungirand our lady kallys thaim. that gretly couetes riȝt|wysnes. wysdom. grace. & coumfort in the holygost. that ay stirs the desire to receyf more & to contynu it. and swylke he fulfild of godis profetabul. delitabil. & honest. the first helpis til merit. the tother drawys the ȝernyng. the thryd makys perfyt. til werk of vertu. these [M. B 877, 953, 288. S this, L the.] godes has swete sauour til the soul. thre maner of hungry men er. the whilk god fillis not: that is, tho that desires the pompe of the worlde, and erthly thinges. and harmyng of thair neiȝbur. the first hungur is of bitturnes. the tother of Auarice. the thrid of bak|bytyng: & the ryche men of this worlde in welth and ees. and ypocrytes, that letys as thei were ryche in gostly godes. he left tome of grace and ioy. thof thei be ful of fauour and vile lustys of body. bot in the day of dome thei shal fynd nouȝt bot pyne.
9. Suscepit israel puerum suum: recordatus miseri|cordie sue. ¶ He receyfyd israel his barne: vmthouȝt of his mercy.
10. Sicut locutus est ad patres nostros: abraham & semini eius in secula. ¶ As he spake til our fadurs: til Abraham & tyl his sede in worldes. ¶ Thus shal the lettur be ioyned: he receyfyd israel his barne [N. L childe.] , for mekenes and clennes, as he spake til our fadirs. and that he did, vmthouȝt of his mercy. the whilke he hygth to do tyl Abraham. and til his sede. that is, til all
