sall fulfill in thaim. ¶ That is, all kyndis of tourmentis sal cum on thaim: the whilk ere ill til thaim that suffirs. bot thai ere rightwis in godis dome. and myn arwis, that is, sharpe and sare bytand pynys, .i. sall fulfill in thaim: that is, thai [S. U .i.] sall be ful of tha pynys. and till that cum.
36. Consumentur fame: & deuorabunt eos aues morsu amarissimo. ¶ Thai sall be destroyd with hungyre: and deuoure thaim sall fughils in bitynge bittirest. ¶ That is, in this warld thai dye in saule for hungyre of godis worde. and swa fendis etis thaim thorgh venymous temptacioun. in whilke thai fall, that is till thaim full bittire bitynge.
37. Dentes bestiarum immittam in eos: cum furore tra|hencium super terram atque serpencium. ¶ Teth of bestis .i. sall send in thaim; with woednes of draghand abouen erth. and of serpentis [S nedders.] . ¶ That is, gnawyngis of deuyls. the whilk cruelly ryuys saules fra god. and scatirs in sere vicys: with wodnes of thaim that draghis and entycis til fleyssly werkis. as wode men, vengaund thaim. and of neddyrs. that is, of temptand pryuely; swa that all ill cum on ill men. for;
38. Foris vastabit eos gladius & intus pauor: iuuenem simul ac virginem, lactentem eum homine sene. ¶ With|outen sall waste thaim the swerd; and withinen drede: ȝonge man and maydyn togydire. sowkand with eldryn man. ¶ That is, the swerd of hell fyre. sall be thaire pyne in body and in saule. thai sall hafe the worme of ill consciens bitand and etand thaim. withouten ende. and that swerd sall waste ȝonge man. that is, ilkan that is iolife and lycherous. defouland his elde in syn. and maydyn, that is, ilkan that is barayn of goed werke. ȝonge man and maydyn he settys to gydire in pyne. for thai ere wont to be to gydire in syn. sowkand is he that has na witt to do wele. eldryn man is he that dwellis in his alde syn. Lo ȝe may see that he closis fra the fyre of hell nouther man na womman. ȝonge na alde. for of all maner of men grete parte ga till hell.
39. Et dixi vbinam sunt: cessare faciam ex hominibus memoriam eorum. ¶ And .i. sayd whare ere thai: .i. sall make to cese fra men the mynd of tha. ¶ I sall say in my lufers. whare ere thai now all bicumyn. that florysst in this warlde. and whare is
