stalworthly faght agayns all ill stiryngis. for godis luf. he, this prophet, assentis noght til the luf of any creature. that couaytis that he rote abouen erth. are he suffire pyne in the tother warld.
27. Ficus enim non florebit: & non erit germen in vineis. ¶ ffor the fige [S fike.] sall noght floryss; and burioyn sall noght be in the vyners. ¶ That is, gret part of cristen men that semyd to be swete in devocioun sal na floure shew of vertu. and the rote of charite. that was wont to make men drunkyn in gastly ioy. in thaim sall be dry.
28. Mencietur opus oliue: & arua non afferent cibum. ¶ The werk of olyue sall leghe; and feldis sal noght brynge forth mete. ¶ That is, sum kyngis and prestis sall faile fra mercy and goed werk, and swa thai leghe. for thai do noght as thai hight til god. and feldis, that is, thaire sugetis. sall noght gif gastly froyt to pay god.
29. Abscidetur de ouili pecus: & non erit armentum in presepibus. ¶ Away sall be smytyn best of the fald; and nete sall noght be in kribbis. ¶ Beste, that is, ilk ill cristen man lifand as beste, sall be smytyn away as a ded lym out of the fald of haly|kyrk. and nete, that is, gastly trauaylers. sall noght be in kribbis. that is, in the degres of rightwis lyfe. for nerhand all, at [S ins. the.] regard of many ill. sall fall in till errours.
30. Ego autem in domino gaudebo: & exultabo in deo ihū meo. ¶ Bot .i. in lord sall ioy; and .i. sall be glad [S. U gald.] in god my ihū. ¶ This is the saghe of chosen men that lastis stabilly in godis luf. aswhasay. thai hafe thaire ioy in erth and peryss thare with. bot .i. sal ioy in my lord, thorgh swetnes of his luf. and .i. sall be glad in god my ihū. that is, my saueoure. noght in the warld my losere. for.
31. Deus dominus fortitudo mea: & ponet pedes meos quasi ceruorum. ¶ God lord my strenght; and he sall sett my fete as of hertis. ¶ Ill men fete ere set as of wayke assis. that ere festid in myddis of the layre. swa thaire affecciouns ere ay takild with sum luf. that draghis thaim fra godis luf. bot haly mennys affecciouns ere as of hertis, that lepis ouyre all lettyngis. and kastis out of thaire hert all glet. ellis myght thai neuer luf crist verraly.
32. Et super excelsa mea deducet me victor: in psalmis canentem. ¶ And abouen my heghe the victore sall lede me: in psalmys syngand. ¶ Crist, that is victor of ded. and of the
