the dust. that is, fra ill life. that is stird with ilke wynd of tempta|cioun. the nedy, that is, him that knawis his gastly nede, and forthi he is ay askand of god that he be noght dust. and out of the fen. that is, of the corumpcioun of body. rightand the pore. that is, despisere of this warld. and haly lufere of crist.
12. Vt sedeat cum principibus: & solium glorie teneat. ¶ That he sytt with pryncis: and hald the solere of ioy. ¶ That is, that he be in mede and rest with apostils. and in the day of dome halde the trone & the pouste of demynge.
13. Domini enim sunt cardines terre: & posuit super eos orbem. ¶ ffor the lordis ere the herrys of the erth; and he sett on thaim the warld. ¶ The herrys of erth ere the perfyt men of haly kirke in trouth & charite, thorgh whaim othere ere broght til stabilnes and festyngynge. and he sett on thaim the warld. that is, thaim he sett grund of his kirk. als wyde as it is thorgh the warld.
14. Pedes sanctorum suorum seruabit, & impij in tene|bris conticescent: quia non in fortitudine sua roborabitur vir. ¶ The fete of his halighis he sall kepe. and the wickid in myrknes sall be still: for noght in his stalworthnes sall man be strenghid. ¶ The fete, that is, the goed affecciouns. and the deuot ȝernyngis of his halighis. 'that is, of them wham he halowes' [S. U om.] and haldis clene. he sall kepe fra fallynge. for on tha fett thai ga till god. and wickid men, withouten pite. of thaire aghyn saule, in myrknes of ygnoraunce and ill dedis sall be still. that thai loue noght god na shrife thaire synnys verrayly. for noght in his stal|worthness is aman strenghyd. that is, haly [U repeats haly.] men has na presump|cioun of thaire aghyn vertu. and of strenght, as proud men has whas strenght is chesun of thaire dampnacioun.
15. Dominum formidabunt aduersarij eius: & super illos in celis tonabit. ¶ The aduersarys of oure lord sall dred him; and abouen thaim in heuyns he sall thonyre. ¶ Godis enmys ere all that dos agayns rightwisnes, or that lufis falshede. and if thai will noght drede him now. at the last thai sall drede him. when he bigynnys to deme, and thonyrs horribily abouen thaim, sayand til thaim. Ga ȝe werid in til fyre withouten end. that is graythid til the deuyl and till his aungels.
16. Dominus iudicabit fines terre, & dabit imperium regi suo: & sublimabit cornu xpi sui. ¶ Lord sall deme
