werkis of thi fyngirs; the mone and the sternes the whilk thou grundid. ¶ Thou distroys all that ere contrariand til the. bot i. in all thynge confourme me to doe thi will: forthi i sall see in life with|outen end thi heuens, that is aungels and apostles, the whilk ere werkis of thi fyngirs. that is thai ere made perfite thurgh the haly gast of whaim is seuen giftes thof he be bot a spirit. as many fyn|girs ere in a hand. and i. sall se the mone. that is halykirke, and the sternes, that is ilk rightwisman by him selfe, the whilk thou grundid in charite.
5. Quid est homo quod memor es eius: aut filius hom|inis quoniam visitas eum. ¶ What is man that thou ert mynand of him; or son of man for thou visites him. ¶ As it ware with dispite he says Man, erthly and synful, what is he that thou has mynd of him, as fere sett fra the: at the lest gifand him hele and ese of body. or son of man. that is he that is gastly and beris the ymage of heuen, what is he for thou visites him as present, the whilk is nere the for clennes of lyf. or son of man he callis crist, thurgh whaim he visites man kynde.
6. Minuisti eum paulominus ab angelis: gloria & honore coronasti eum, & constituisti eum super opera manuum tuarum. ¶ Thou lessid hym a litel fra aungels: with ioy and honour thou coround him, and thou sett him abouen the werkis of thi hend. ¶ Crist was lessid fra aungels, for he was dedly and myght suffire pyne. bot a litell, for in othere thyngis he is abouen aungels, thaire kynge: and sythen thou coround him with ioy, that is with brighthed of body, na mare suffrand pyne. and honur, for he is honurabile till all: and thou sett him abouen aungels and all creaturs.
7. Omnia subiecisti sub pedibus eius: oues & boues vniuersas, insuper et pecora campi. ¶ All thyngis thou vn|dirkast vndir his fete; shepe & oxin all, ouer that and the bestis of the feld. ¶ That is vndire his lordship and his myght thou has kasten all thynge. tha ere shepe that is innocents, als well aungels as men: and oxyn, tha ere trauailand men gastly in halykirke, ouer that and the bestis of the feld, thai ere lufers of this warld, wonnand in the feld of fleschly lustes noght in hilles of vertues: and swa by the brad way thai ga till hell.
8. Volucres celi & pisces maris: qui perambulant se|mitas maris. ¶ ffoghlis of heuen & fischis of the see; that gas the wayes of the se. ¶ ffoghlis of heuen ere proud men, that
