the dayes in the whilke .i. soulde hafe lifid, .i. sall ga til the ȝatis of hell. that is, .i. thus vnperfit dyand sall pass til hell. for thidire ȝede all men bifore the [S, M. U om.] cumynge of ihū crist. and tharfore.
2. Quesiui residuum annorum meorum: dixi non videbo dominum deum in terra viuencium. ¶ I soght the lefynge of my ȝeris: .i. sayd .i. sall noght se the lord god in land of lifand. ¶ I soght, prayand til god. that .i. myght end the lefynge of my ȝeris. that is, that .i. myght brynge my life til perfitnes and fulnes of dayes. for .i. sayd in me self, if .i. now dye withouten childe .i. sall noght see god man in heuen. Aswhasay, .i. cum neuer thare. for he wist that god had hight til dauid that godis sun sould be borne of his kynde. and that myght noght hafe bene if ezechy had dyed & left na sede abouen erth. and .i. sayde.
3. Non aspiciam hominem vltra: & habitatorem quietis. ¶ I sall noght se man ouyre; and wonere of rest. ¶ I sall noght se him that is god and man, born of my kynde, ouyre. that is, eftire that .i. be ded. and .i. sall noght see wonere of rest. that is, .i. sall noght see the cumpany of chosen men wonand in endles rest. and with whaim to won ware rest delitabil. for lo.
4. Generacio mea ablata est & conuoluta est a me: quasi tabernaculum pastorum. ¶ My generacioun reft is and samyn lappid is fra me; as tabernakils of hirdis. ¶ My generacioun. that is, succession of childire is sa hally remouyd fra me. as taber|nakils of hirdis, that is in shorte while lappid to gidire, & remoud is noght sene. and tharwith.
5. Precisa est velut a texente vita mea: dum adhuc ordirer succidit me. ¶ Bifore shorne is as of the wefand my life; whils ȝit .i. bigan. he sheris me down. ¶ My life is shorne away in ȝouthede. bifore are .i. com til elde. as of the wefand that sheris down the web are it be fulfild. and ȝit whils .i. bigan to lif. he sheris me down with sikill of ded. for na sonere bigyn we to life than we bigyn to dye.
6. De mane vsque ad vesperam finies me: sperabam vsque ad mane, quasi leo sic contriuit omnia ossa mea. ¶ ffra morn till euyn thou sall ende me: .i. hopid til the morne, as lyoun swa he brak all my banys. ¶ He spekis in the manere of a man that liggys in a strayte fifere. that fra morn till euyn abidys outher passynge of the euyll. or ded. .i. hopid til the morn. that is,
