8. Dominus custodit aduenas, pupillum & viduam susci|piet: & vias peccatorum disperdet. ¶ Lord kepis cumlyngis. fadirles & widow he sall resayfe: and the wayes of synful he sall wast. ¶ Cumlyngis ere [S ins. tho.] that has here na dwellynge stede, bot ay thaim langis til thaire heritage in heuen. fadirles & widow ere thai that ere withouten help and solace of men. that thai hope anly in god and take comfort of him. and the brayde wayes of synful, that laghis til hethynge oure narow way. he sall dystroy. and we hafe noght bot ioy.
9. Regnabit dominus in secula: deus tuus syon in gene|racionem & generacionem. ¶ Lord sall regne in worldis; thi god syon in generacioun and generacioun. ¶ Oure lord sall regne in vs in heuen. he is thi god syon. that is, halykirke. and thou ert his kyngdom, in whaim he sall be kynge withouten end.
[PSALM CXLVI.]
LAUDATE dominum quoniam bonus est psalmus: deo nostro sit iocunda decoraque laudacio. ¶ Louys oure lord for goed is the psalme; till oure god be diletabil and fayre louynge. ¶ Aswhasay, forthi louys, for it is goed to loue. Godis louynge is oure blisfulhede. he louys ay that ay wirkis goed. forthi goed is the psalme. for goed is the louynge of god in voice & dede. that it be til him delitabil and fayre. that is, when it is in vertus and charite. that is, noght in the mouth of a synful man. that in ill maners syngis a goed sange.
2. Edificans ierusalem dominus: dispersiones israelis congregabit. ¶ Biggand ierusalem oure lord; the scatiryngis of israel he sall gadire. ¶ That is, oure lord makis ierusalem the cite of heuen. of lifand stanys, that is, haly men. restorand with thaim the fallynge of aungels. and he sall gadire in a trouth and charite trew men that ware scatird. the whilke he gadirs, that tha be in his edyfyinge of heuen. ilke man in his degre. and he is.
3. Qui sanat contritos corde: & alligat contriciones eorum. ¶ That helis the contryte of hert; and he byndis all thaire brekyngis. ¶ Contryte of hert ere thai that offirs til him the sa|crifice of sorouful gast. perfit hele sall be when we ryse glorifyde in body and saule. bot now as a leche he byndis oure brekyngis of
