risynge. the whilke crist reft fra the iwes. and gifis all grace to fynd thaim in him. that will luf him.
163. Iniquitatem odio habui & abhominatus sum: legem autem tuam dilexi. ¶ Wickidnes .i. had in hateredyn; and .i. it wlathid bot .i. lufid thi laghe. ¶ Luf of godenes. is prouyd hateredyn of malice. withouten that has na man luf verray til godis laghe.
164. Sepcies in die laudem dixi tibi: super iudicia iusticie tue. ¶ Seuen sythe in the day .i. sayd louynge til the; on the domys of thi rightwisnes. ¶ That is, .i. ful of the seuen giftis of the halygast. louyd the on the domys. that is chastiynge of thi rightwisnes. in [S ins. the.] whilke thou makis thi sunnys rightwis. and thai loue the of thi rightwis domys.
165. Pax multa diligentibus legem tuam: & non est illis scandalum. ¶ Mykel pes to the lufand thi laghe; and sclawn|dire is noght til thaim. ¶ Thai hafe mykel pes. for charite puttis away all lettyngis and vnrest of thoght. and swa thai ere noght sclawndire [S sclaunderde.] . that is, thai wreth noght ihū crist. and thai take neuer|mare ill ensaumpill, what sa men do. bot thai hald ay stabilly the way of charite.
166. Expectabam salutare tuum domine: & mandata tua dilexi. ¶ I abade thi hele lord; and thi comaundmentis .i. lufid. ¶ Ellis abade he noght verraly ihū. bot he lufis that ihū lufis.
167. Custodiuit anima mea testimonia tua: & dilexit ea vehementer. ¶ My saule kepid thi witnessyngis; and it lufid thaim gretly. ¶ ffor mare is to luf thaim than to kepe thaim.
168. Seruaui mandata tua & testimonia tua: quia omnes vie mee in conspectu tuo. ¶ I kepid thi comaundmentis and thi witnessyngis; for all my wayes in thi sight. ¶ That is [S. U om.] , my thoghtis [U ins. 'my thoghts.'] my wordis and my dedis ere lightid of thi grace. and alouyd byfor [U alouyd by for. S ay loued befor. M halowed before.] the, thof men thynke thaim chesunabile.
169. Appropinquet deprecacio mea in conspectu tuo domine: iuxta eloquium tuum da michi intellectum. ¶ My praiynge neghe in thi sight lord; bisyde thi worde gif me vndirstandynge. ¶ That is, my prayere made til the. be herd. in this gif me vndirstandynge, that .i. hafe sauoure in thi worde. and vanyss noght away thorght mannys [U manny. S mans.] foly.
