charite, and thyke in stabilnes: waxand in luf til ȝe cum til the horne of the autere. that is, till ȝe be raysid in til the heghnes of contemplacioun. whare ȝe sall loue god in voice of ioiynge. and wondirful devocioun in brennand softnes. sayand til god.
27. Deus meus es tu & confitebor tibi: deus meus es tu & exaltabo te. ¶ My god ert thou. and .i. sall shrife til the: my god ert thou, and .i. sall heghe the. ¶ That is, .i. sall loue the in worde & werke.
28. Confitebor tibi quoniam exaudisti me: & factus es michi in salutem. ¶ I sall shrife til the for thou herd me; and made thou ert til me in hele. ¶ In louynge he thankis that ay is glade eftire benefycis.
29. Confitemini domino quoniam bonus: quoniam in seculum misericordia eius. ¶ Shrifis til lord for he is goed: for in warld the mercy of him. ¶ The psalme endis as it bigan. for fra we be borne til we dye na thynge [U thynke.] halesumere delitis vs than louynge of god.
[PSALM CXVIII.]
BEATI immaculati in via: qui ambulant in lege domini. ¶ Blisful vnfyld in way; the whilke gas in laghe of lord. ¶ Other psalmys as sternys gifes light. bot this psalme as sun brennand in mydday of ful light all shynys of haly lare. and morale swetnes, in the whilke the rightwisman spekis. now grauntand that he has takyn of god. now eft hopand that he has deseruyd. Aswhasay. sere men sekis sere thyngis to delite thaim in. bot thai that will be blisful with god. be vnfyld of syn in way. that is, in crist. and swilke ere tha that gas. that is. that lifis noght ydil. in laghe of oure lord ledand thaim in it. bot that may thai noght do. bot if thai knaw his laghe.
2. Beati qui scrutantur testimonia eius: in toto corde exquirunt eum. ¶ Blisful thai that ransakis his witnessyngis; thai seke him in all thaire hert. ¶ ffirst aghe aman to amend his life and sithyn ransake godis witnessyngis. that is, his wordis, to knaw thaim. and swa thai ere blisful if thai seke crist in all thaire hert. that na parte be gifen til any creature. that ill men will noght do.
